लग्नानंतरचं आयुष्य म्हणजे फक्त जबाबदाऱ्या, बिलं आणि रोजची धावपळ नसते. तर, या धावपळीत एकमेकांना सावरून घेणं म्हणजे संसार! अनेकदा आपल्याला वाटतं की संसार सुखी करण्यासाठी काहीतरी खूप मोठं करावं लागतं, पण खरं सांगू का? त्याचं रहस्य अगदी छोट्या गोष्टींत दडलेलं असतं.ते रहस्य म्हणजे – दोन शब्द प्रेमाचे!
१. शब्दांची ताकद ओळखा :
दिवसभर कामाचा कितीही ताण असला, तरी घरी आल्यावर जोडीदाराने प्रेमाने विचारलेलं “आजचा दिवस कसा होता?” हे वाक्य सगळा ताण हलका करतं. आपल्या हक्काच्या माणसाकडून आलेले प्रेमाचे दोन शब्द कोणत्याही औषधापेक्षा जास्त काम करतात.
२. कौतुक :
संसाराची ‘गुळपापडी’संसारात गोडवा टिकवायचा असेल, तर कौतुक करायला शिका. “आज तू खूप छान दिसतेयस” किंवा “जेवण अगदी मनासारखं झालंय,” हे बोलायला पैसे लागत नाहीत, पण यामुळे समोरच्या व्यक्तीला जे समाधान मिळतं, ते अमूल्य असतं.
३.’सॉरी’ आणि ‘थँक्यू’चं महत्त्व :
नात्यात अहंकार न आणता, चूक झाली तर ‘सॉरी’ म्हणणं आणि जोडीदाराने केलेल्या मदतीबद्दल ‘थँक्यू’ म्हणणं, हे सुखी संसाराचे दोन भक्कम खांब आहेत. हे छोटे शब्द मोठमोठी भांडणं क्षणात संपवू शकतात.
४.एकमेकांचे ‘सपोर्ट सिस्टिम’ बना :
संसार म्हटला की चढ-उतार येणारच. अशा वेळी “काळजी नको करू, मी आहे ना तुझ्यासोबत!” हे प्रेमाचे दोन शब्द जोडीदाराला नवी उमेद देतात. एकमेकांवरचा विश्वास हाच सुखी संसाराचा पाया असतो.
५. ‘मौन’ देखील बरंच काही सांगतं :
नेहमी शब्दांचीच गरज असते असं नाही. कधीकधी जोडीदार तणावात असेल, तर फक्त त्यांच्या शेजारी बसणं, शांतपणे त्यांचा हात हातात घेणं किंवा फक्त त्यांचं म्हणणं पूर्ण ऐकून घेणं, हे ‘दोन शब्द’ बोलण्यापेक्षाही जास्त प्रेम व्यक्त करतं.
६.एकमेकांच्या आवडीनिवडींचा आदर :
संसारात दोन भिन्न स्वभावाच्या व्यक्ती एकत्र येतात. जोडीदाराला एखादी गोष्ट आवडत नसेल, तर त्यावर टीका करण्यापेक्षा “तुला हे आवडत नाही ना, मग आपण दुसरं काहीतरी करूया,” असं म्हणणं म्हणजे खऱ्या प्रेमाची दाद देणं होय.
७.’आम्ही’ आणि ‘आपलं’ यावर भर द्या:
“माझं घर,” “माझे पैसे,” “माझी अडचण” म्हणण्यापेक्षा “आपलं घर” किंवा “आपण मिळून हे करूया” असे शब्द वापरा. जेव्हा भाषेत ‘मी’ची जागा ‘आम्ही’ घेतो, तेव्हा नातं अधिक घट्ट होतं.
८. भूतकाळ उकरून काढणे टाळा:
भांडण कोणाचं होत नाही? पण सुखी संसाराचं रहस्य हे आहे की, भांडताना जुन्या गोष्टी (जे १० वर्षांपूर्वी झालं होतं ते) काढू नका. “जाऊ दे, जे झालं ते झालं, आता आपण पुढे बघूया,” हे दोन शब्द कोणत्याही वादावर पडदा टाकू शकतात.
९. छोट्या चुकांकडे दुर्लक्ष करा :(Let it Go)
चहा सांडला, भाजीला मीठ कमी झालं किंवा एखादी वस्तू वेळेवर मिळाली नाही, तर त्यावर चिडण्यापेक्षा हसून “काही हरकत नाही, दुसऱ्यांदा बघू,” असं म्हणणं संसारातली शांती टिकवून ठेवतं.
१०.स्वप्नांना पंख द्या:
जोडीदाराच्या मनात काहीतरी नवीन करण्याची इच्छा असेल, तर “तू हे नक्की करू शकतोस/शकतेस, माझा तुला पूर्ण पाठिंबा आहे,” हे शब्द त्यांना जगातील सर्वात आनंदी व्यक्ती बनवू शकतात
संसार म्हणजे दोन व्यक्तींनी एकमेकांकडे बघत राहणं नव्हे, तर दोघांनी मिळून एकाच दिशेने बघणं आणि एकमेकांच्या साथीने चालणं होय.”
